BIGOGWE:IBUYE FATIZO RYASHYIZWE AHAGIYE KUBAKIRWA IMIRYANGO 30

Mu Kagari ka Kijote, Umurenge wa Bigogwe,hatangijwe igikorwa cyo kubakira imiryango 30 yagizweho ingaruka n’ibiza, mu rwego rwo gufasha abaturage kongera kubaho mu buzima bwiza no guteza imbere imibereho yabo.

Iki gikorwa cyabaye kuri uyu wa Mbere, gikorwa ku bufatanye bw’abaturage, Ingabo z’u Rwanda n’Urwego rwa Police y’u Rwanda hamwe n’izindi nzego zitandukanye, mu bikorwa bigamije gufasha abaturage mu mibereho myiza n’iterambere mu mwaka wa 2026. 

Uyu muhango witabiriwe n’abayobozi batandukanye barimo Umuyobozi w’Akarere ka Nyabihu, MUKANDAYISENGA Antoinette, Guverineri w’Intara y’Iburengerazuba NTIBITURA Jean Bosco,Umuyobozi w'ingabo-Diviziyo ikorera mu Burengerazuba, Maj Gen Eugene NKUBITO,ndetse n’Umuyobozi Mukuru wa Police y’u Rwanda IGP Felix NAMUHORANYE, wari n’Umushyitsi Mukuru muri iki gikorwa.

Mu butumwa yagejeje ku bitabiriye iki gikorwa, CG Felix NAMUHORANYE yashimangiye ko umutekano w’Igihugu ugomba kujyana no kwita ku mibereho myiza y’abaturage.

Yagize ati: “Dutangije iyi gahunda dufatanyije n’abaturage kuko kurinda igihugu bijyana no kwita ku mibereho myiza y’Abanyarwanda. Ni yo mpamvu twahisemo ibikorwa bifatika bigira umumaro mu buzima bwabo bwa buri munsi, kugira ngo umuturage ahore ku isonga aho ari hose.”

Biteganyijwe ko nyuma yo gushyira ibuye fatizo,imirimo yo kubaka izahita itangira kugira ngo iyi miryango 30 izahabwe amacumbi ajyanye n’igihe kandi arambye.