RUGERA YAHAWE IGIKOMBE CY’INDASHYIKIRWA MU KWISHYURA MITUWELI

Ku wa 12 Kanama 2026, abaturage b’Umurenge wa Rugera bahawe igikombe cy’indashyikirwa mu kwishyura ubwisungane mu kwivuza (MUSA) mu mwaka wa 2025–2026, nyuma yo kuza ku isonga mu mirenge 12 igize Akarere.

Iki gikorwa cyayobowe n’Umuyobozi w’Akarere wungirije ushinzwe imibereho myiza y’abaturage, Bwana SIMPENZWE Pascal, hanatangwa ubutumwa bushishikariza abaturage kwirinda inzoga zitujuje ubuziranenge, ndetse n’urubyiruko rushishikarizwa kugana ibigo by’imari no kubyaza umusaruro amahirwe ahari.

Umuyobozi w’Akarere ushinzwe imibereho myiza y’abaturage yasabye Umurenge wa Rugera gukomeza guharanira kuba indashyikirwa, kuko igikombe gihabwa burundu umurenge ubasha kwegukana umwanya wa mbere inshuro eshatu zikurikirana.

Igikorwa cyo guhemba imirenge yahize indi kizakomereza mu Mirenge ya Kabatwa na Shyira, mu cyumweru gitaha, nk’uko byatangajwe n’umukozi ukurikirana ibijyanye na Mituweli mu Karere.