UBUHINZI BW’IBIRETI MURI NYABIHU NA RUBAVU BWINJIZA ASAGA 2.4 MILIYALI

Ku wa 30 Nzeri 2026, abayobozi n’abafatanyabikorwa mu buhinzi bw’ibireti bitabiriye ibirori ngarukamwaka bya Horizon SOPYRWA Ltd byo gushimira no guhemba abahinzi b’ibireti b’indashyikirwa bo mu Turere twa Nyabihu na Rubavu. Ibirori byabereye mu Murenge wa Kabatwa, Akagari ka Myuga, byitabirwa na Guverineri w’Intara y’Iburengerazuba, NTIBITURA Jean Bosco, Umuyobozi w’Akarere ka Rubavu, MURINDWA Prosper, Umuyobozi Mukuru wa Horizon SOPYRWA Ltd, BIZIMUNGU Gabriel, inzego z’umutekano, n’abandi bafatanyabikorwa bakiriwe na Meya MUKANDAYISENGA Antoinette.

Mu butumwa bwatanzwe, abayobozi bashimiye abahinzi b’indashyikirwa ku ruhare bagira mu kongera umusaruro w’ibireti, banabasaba gukomeza guteza imbere ubu buhinzi no gusangiza abandi bahinzi ubumenyi bafite. Guverineri NTIBITURA Jean Bosco yavuze ko ibireti ari igihingwa ngengabukungu gifasha Igihugu kwinjiza amadevize, kuko bivamo imiti ikoreshwa mu kurwanya ibyonnyi byangiza ibihingwa n’amatungo, mu gihe abahinzi babikuramo amafaranga abafasha kwiteza imbere.

Muri ibi birori hagaragajwe ko Uturere twa Nyabihu na Rubavu dutanga hafi toni 1,620 z’ibireti ku mwaka, bingana na 75% by’umusaruro wose utunganywa na Horizon SOPYRWA Ltd. Uyu musaruro ugera ku gaciro k’amafaranga agera kuri miliyari 2.4 Frw yinjira mu miryango y’abahinzi b’ibireti, bikagaragaza uruhare uru rwego rufite mu guteza imbere imibereho y’abaturage n’ubukungu bw’Uturere.

Abahinzi 350 bahawe ibihembo bitandukanye birimo amasuka 90, amashitingi 350 yo kwanikaho ibireti, matelas 40 n’inka 10. Izi nka 10 ziyongera ku nka 53 zatanzwe ku bandi bahinzi nyuma yo korozwa, mu rwego rwo gukomeza gufasha abahinzi kuzamura imibereho yabo no guteza imbere ubworozi bujyana n’ubuhinzi bw’ibireti.

Horizon SOPYRWA Ltd n’abafatanyabikorwa bayo basabye abahinzi gukomeza kongera umusaruro no kunoza imikorere, mu gihe inzego z’ubuyobozi n’amakoperative zizakomeza gushyigikira gahunda zigamije guteza imbere ubuhinzi bw’ibireti. Ibi birori byabaye umwanya wo gushimira abahinzi b’indashyikirwa no gushimangira ubufatanye mu guteza imbere uru rwego.