Nyagahondo, Rugera – 14 Ukwakira 2025

Mu nteko z’abaturage zabereye hirya no hino mu Karere kuri uyu wa 14 Ukwakira 2025, abaturage n’abayobozi baganiriye ku nsanganyamatsiko zitandukanye zigamije guteza imbere imibereho myiza n’iterambere rirambye.

Inteko yitabiriwe n’abayobozi batandukanye ndetse n’abaturage b’Akagari ka Nyagahondo mu Murenge wa Rugera, iyoborwa n’Umuyobozi w’Akarere Wungirije ushinzwe Iterambere ry’Ubukungu, Bwana HABANABAKIZE Jean Claude.

Mu biganiro byabaye, hanagarutswe ku ngingo zifitanye isano n’isuku n’isukura, uruhare rw’ababyeyi mu gutuma abana bafata ifunguro rya saa sita ku ishuri, ndetse no ku ruhare rw’umuturage mu igenamigambi ry’Igihugu n’ishyirwa mu bikorwa rya Gahunda y’Iterambere ry’Imyaka itanu (2024–2029).

Abaturage bahawe umwanya wo gutanga ibitekerezo no kubaza ibibazo birebana n’imibereho yabo ya buri munsi. Ibibazo byinshi byasubijwe ako kanya, ibindi bihabwa umurongo wo gukurikiranwa n’inzego zibifitiye ububasha.

Bwana HABANABAKIZE yashimangiye ko inteko z’abaturage ari uburyo bukomeye bwo kwegera abaturage, kumva ibitekerezo byabo no kubasobanurira gahunda za Leta zigamije iterambere rusange. Yaboneyeho gusaba buri muturage kugira uruhare mu igenamigambi ry’Akarere no gushyigikira gahunda za Leta zirebana n’uburezi, isuku, ubuhinzi, n’imibereho myiza.

“Iterambere ry’igihugu ntirishoboka hatabayeho uruhare rw’umuturage. Twese dufite inshingano mu kubaka igihugu cyacu,”, Bwana HABANABAKIZE Jean Claude.

Abaturage bitabiriye inteko bashimiye abayobozi uburyo bakomeje kubegera, bagasobanurirwa gahunda zitandukanye kandi bakaboneraho n’amahirwe yo gutanga ibitekerezo bigamije kunoza serivisi n’iterambere ryabo.