Mu rwego rwo kwibuka ku nshuro ya 32 Jenoside yakorewe Abatutsi mu 1994, kuri uyu munsi ku rwibutso rw’Akarere ka Nyabihu ruherereye mu Murenge wa Mukamira habereye igikorwa cyo kwibuka cyahujwe no gushyingura mu cyubahiro imibiri itandatu yabonetse mu mirenge ya Jenda na Rambura.

Iki gikorwa cyitabiriwe n’abayobozi batandukanye ku rwego rw’Igihugu n’urw’Intara, barimo Guverineri w’Intara y’Iburengerazuba, Bwana Jean Bosco NTIBITURA, wakiriwe n’Umuyobozi w’Akarere ka Nyabihu, Mme MUKANDAYISENGA Antoinette, ari kumwe n’inzego z’umutekano n’izindi nzego z’ubuyobozi.

Abandi bayobozi bitabiriye barimo Senateri MURESHYANKWANO Marie Rose, Depite BAKUNDUFITE Christine,Intumwa ya IBUKA ku rwego rw’Igihugu,Hon.MANIRARORA Annoncée, abayobozi mu nzego z’umutekano, abayobozi b’Uturere dutandukanye, abahagarariye amadini n’amatorero ndetse n’abaturage benshi.

Igikorwa cyaranzwe n’umunota wo kwibuka, ibiganiro ku mateka ya Jenoside yakorewe Abatutsi, ubuhamya bw’abarokotse, indirimbo zijyanye n’ibihe byo kwibuka, ndetse n’ubutumwa bwatanzwe n’abayobozi batandukanye. Hanashyizwe indabo ku mva zishyinguwemo abazize Jenoside, mu rwego rwo kubaha icyubahiro.

Mu butumwa bwatanzwe, hibanzwe ku guhumuriza abarokotse Jenoside, by’umwihariko abashyinguye ababo kuri uyu munsi, hanasabwa abaturage gukomeza gutanga amakuru ku hantu hashobora kuba hakiri imibiri itarashyingurwa mu cyubahiro, kugira ngo na yo ishyingurwe mu cyubahiro gikwiye.

Ubuyobozi bw’Akarere bwongeye gushimangira akamaro ko gukomeza kwibuka, kurwanya ingengabitekerezo ya Jenoside haherewe mu rubyiruko no kubaka ubumwe n’ubudaheranwa bw’Abanyarwanda.