Uyu munsi kuwa 05 Nzeri 2025,DM TWAGIRAYEZU Jean Paul arikumwe n’Umuyobozi w’ishami ry’ubuzima mu Karere, Bwana Safari Alexandre, bitabiriye igikorwa cy’ingenzi cyo gutangiza ku mugaragaro umushinga mushya uzwi ku izina rya GAIN (Global Alliance for Improved Nutrition). Uyu mushinga w’Abasuwisi ugamije gukumira no kurwanya igwingira mu bana bato, ibibazo bikigaragara mu Karere ndetse bikagira ingaruka mbi ku mikurire y’abana n’iterambere rusange ry’igihugu.

Iki gikorwa cyabereye mu Ishuri rya Coding Academy riherereye mu Murenge wa Mukamira. Cyitabiriwe n’inzego zitandukanye zishinzwe ubuzima, imirire n’uburenganzira bw’umwana, zirimo Abakozi b’Ikigo cy’Igihugu gishinzwe imikurire no kurengera umwana, abayobozi barimo uw'’Ibitaro n’ibigonderabuzima,ab’Ikigo cy’Igihugu gishinzwe guteza imbere ubuhinzi n’ubworozi n'abikorera ki giti cyabo. Aba bafatanyabikorwa bazakorera hamwe kugira ngo hashyirweho ingamba zihamye zishingiye ku bukangurambaga, gutanga indyo yuzuye ku bana n’abagore batwite, ndetse no gukurikirana uko ibikorwa bikorwa ku rwego rw’imidugudu. Abitabiriye igikorwa bashimangiye ko guhangana n’igwingira bisaba ubufatanye bwa buri rwego, guhera ku muryango kugera ku nzego z’igihugu.

Mu ijambo rye, Bwana TWAGIRAYEZU Jean Paul yagaragaje ko Akarere gafite ubushake bukomeye bwo gushyira mu bikorwa uyu mushinga ku buryo bunoze, cyane cyane hashingiwe ku mibare igaragaza ko igwingira rigihangayikishije. Yagize ati: "Ntitwakwemera ko abana bacu bakomeza kubura amahirwe yo gukura neza no kugira ubuzima buzira umuze. Turashimira abafatanyabikorwa bose batugiriye icyizere, kandi tuzafatanya nabo kugeza umusaruro ku baturage." Ibi bikorwa bizafasha kongera ubumenyi ku bijyanye n’imirire myiza,kongerera ubushobozi no gutanga inama ku mirire iboneye mu miryango.

GAIN yatangijwe mu mwaka wa 2002.Washingirijwe i Geneva mu Busuwisi mu rwego rwo gukemura ikibazo cy’imirire mibi ku isi, cyane cyane mu bihugu bikiri mu nzira y’amajyambere.Ukaba uzakorera mu Turere dutanu tw'Uburengerazuba harimo n'aka Nyabihu.