Kuri iki cyumweru, tariki ya 29 Ukuboza 2024, Umuyobozi w’Akarere ka Nyabihu, akaba n’umutoza mukuru w’Inzirakurutwa, Madamu Mukandayisenga Antoinette ari kumwe n’abahagarariye inzego z’umutekano ku rwego rw’Intara y’Iburengerazuba n’urw’Akarere, Umunyamabanga Nsgingwabikorwa w’Akarere, Bwana Mugiraneza David n’abakozi batandukanye, yasoje Itorero Inkomezabigwi icyiciro cya 12; igikorwa cyabereye mu cyanya cy’Urwunge rw’amashuri ya Rambura Garcons.

Umuyobozi w’Akarere wungirije ushinzwe imibereho y’abaturage, Bwana Simpenzwe Pascal ari kumwe n’abahagarariye inzego z’umutekano, yasoreje iri Torero mu cyanya cya EAV Bigogwe( Bigogwe TSS).

Uyu muhango witabiriwe kandi n’Umuyobozi mukuru ushinzwe ubukangurambaga muri Minisiteri y’Ubutegetsi bw’Igihugu, Bwana Kubana Richard.

Iri Torero ryasorejwe uyu munsi mu byanya bibiri ari byo GS Rambura Garcons na EAV Bigogwe ryatangiye ku wa gatanu, tariki ya 27 Ukuboza 2024, ritangirizwa mu Mirenge yose igize Akarere ka Nyabihu.

Uyu muhango waranzwe no gusinya Imihigo hagati y’Inkomezabigwi zisoje iri torero n’Umuyobozi w’Akarere, aboneraho n’umwanya wo kuzituma ku rugerero gufatanya n’izindi zatojwe mu byiciro byabanje. Hatanzwe n’ibiganiro bitandunye, birimo; Icyerekezo cy’Igihugu 2050 cyatanzwe n’Umuyobozi w’Akarere wungirije ushinzwe iterambere ry’ubukuingu, Bwana Habanabakize Jean Claude, mu cyanya cya GS Rambura Garcons n’Umuyobozi w’Akarere ushinzwe imibereho y’abaturage, Bwana Simpenzwe Pascal, mu cyanya cya EAV Bigogwe.

Hatanzwe kandi ikiganiro kijyanye n’ibibazo bigaragara mu miryango cyatanzwe n’Umuyobozi wa Police mu Karere, SSP Gasana J. n’Umuyobozi wa RIB mu Karere, Bwana Rwangampuhwe Kayiranga mu cyanya cya Bigogwe. Ikijyanye n’urugamba rwo kubohora Igihugu cyatanzwe n’Umuyobozi w’Inkeragutabara mu Ntara y’Iburengerazuba,Brigadier General Rwigema Wilson n’Umuyobozi w’Inkeragutabara mu Karere, Lt. col. Ntagwabira Evariste, mu Cyanya cya Rambura.

Umuyobozi yasoje asaba izi nkomezabigwi kurangwa no kugira imyitwarire iboneye no kugira indangagaciro ziboneye.