Uyu munsi, tariki ya 08 Ugushyingo 2023,Umuyobozi w’Akarere ka Nyabihu, Madamu Mukandayisenga Antoinette ari kumwe` n’itsinda ry’abakozi b’Akarere, barimo umukozi ushinzwe imicungire y’ibiza, uhagarariye urwego rwa DASSO, bari kumwe kandi n’uhagarariye Inama y’Igihugu y’urubyiruko mu Karere ka Nyabihu, bafatanyije n’ubuyobozi bw’Umurenge wa Mukamira, basuye amazu yubatswe muri gahunda yo gukemura ibibazo bibangamiye imibereho myiza y’abaturage, bakomeje basura kandi umubyeyi ufite umwana  wagaragaye ko afite imirire mibi.

Muri iyi gahunda hari ibyakozwe bitandukanye, birimo; Kureba inama zakozwe kandi hagatangwa raporo, kureba ibibazo byagaragaye ndetse n’ibyakemuwe byari bibangamiye imibereho myiza y’abaturage, gusura abaturage bubakiwe amazu aribo: Mukarugwiza Odette, Nsabiyaremye Jean Baptiste na Musabyimana Esperance. Hasuwe kandi umubyeyi witwa Masengesho ufite umwana wagaragaye ko afite ikibazo cy’imirire mibi.

Nyuma yo gusura amazu yubatswe ndetse no gusura umubyeyi ufite umwana wagaragaje imirire mibi, Umuyobozi w’Akarere yaganirije abaturage, aho yabashishikarije kugira uruhare mu bibakorerwa no gufata neza ibyo bakorerwa, kwishakamo ubushobozi; naho uyu mubyeyi ufite umwana uri mu mirire mibi, yibukijwe ko agomba kugira uruhare runini mu gushakira umwana ibyo kurya byamufasha kugira ubuzima bwiza, ko agomba kwegera ikigo nderabuzima bakamufasha kureba uko ubuzima bw’umwana buhagaze. Ubuyobozi bw’Umurenge kandi bugomba gukomeza gukurikirana uyu mubyeyi no kumugira inama.