Kuri uyu wa gatanu, tariki ya 13 Werurwe 2020, mu Mirenge yose igize Akarere ka Nyabihu habaye umuhango wo gutanga tefefone zigezweho(Smart phones) igihumbi(1000). Iki gikorwa ku rwego rw’Akarere ka Nyabihu, cyabereye mu Murenge wa Mukamira, Akagri ka Rubaya, Umudugudu wa Cyivugiza, witabirwa n’Umunyamabanga Uhoraho muri Minisiteri y’Ikoranabuhanga mu Itumanaho na Inovasiyo, Bwana Iradukunda Yves wakiriwe n’Umuyobozi w’Akarere ka Nyabihu, Madamu Mukandayisenga Antoinette; hari kandi Bwana Ndatira Fabrice, umukozi ushinzwe ikoranabuhanga muri MTN, Bwana Ruhinguka Desire, umukozi ushinzwe imenyekanishabikorwa muri MTN, abahagarariye abafatanyabikorwa batandukanye harimo Rwanda Mountain Tea, Ecobank, PWC.

Ibirori byitabiriwe nanone n’abayobozi ndetse n’abakozi ku rwego rw’Akarere, urw’Umurenge n’Utugari, abahagarariye inzego z’umutekano zikorera mu Karere ka Nyabihu.

Twibutse ko iyi gahunda #Connect Rwanda ari gahunda ihuriweho na Minisiteri y’Ikoranabuhanga na Inovasiyo(MINICT), na MTN Rwanda igamije kuzamura umubare w’abatunze telephone zigezweho (Smart phones) mu Rwanda.

Izi telefoni zagiye zitangwa n’abantu ku giti cyabo n’ibigo bitandukanye bya Leta n’ibyigenga babimburiwe na Nyakubahwa Paul Kagame , Perezida wa Repubulika y’u Rwanda.

Abagenerwabikorwa b’iyi gahunda #Connect Rwanda bakaba ari Abanyarwanda badatunze telephone zigezweho(Smart phones). Izi telephone zizafasha abazihawe gusaba serivise zitandukanye zitangwa hifashishijwe Ikoranabuhanga, ndetse zibafashe no kugera ku makuru atandukanye y’ingenzi mu buzima bwabo bifashishije Ikoranabuhanga.

Nk’impano bahawe rero ibafitiye akamaro basabwe kuzibungabunga no kuzifata neza bazirinda abaziba, birinda kuzigurisha cyangwa kuzangiza.

Abagenerwabikorwa basabwe kwitabira no gukurikirana amahugurwa azabafasha kugira ubumenyi bwo gukoresha izi telefone, ayo mahugurwa azatangira ku wa mbere, tariki ya 16 Werurwe 2020 arangire ku wa gatanu, tariki ya 20 Werurwe 2020, akazabera mu Mirenge batuyemo.