Kuri uyu wa kane, tariki ya 13 Werurwe 2025, mu cyumba mberabyombi cya ECD Basumba habereye umuhango w’ihererekanyabubasha rya ECD Basumba yubatswe kandi ikoreshwa n’umufatanyabikorwa Reach the Children in Rwanda(RCR) uhagarariwe na Bwana Musuhukye Benjamin, aho iyi ECD yavaga ku mufatanyabikorwa RCR ikajya mu maboko (ibikorwa) y’Akarere kimwe n’ibindi bigo bya Leta bikorera mu Karere.

Uyu muhango witabiriwe n’Umuyobozi w’Akarere ka Nyabihu, Madamu Mukandayisenga Antoinette, ari na we wakoranye iri hererekanyabubasha n’Umuyobozi wa RCR mu Rwanda.

Hamurikiwe Akarere ibi bikurikira: 

Inyubako z’ikigo zigizwe n’ibyumba by’amashuri, ubwiherero, icyumba cy’inama, igikoni n’ibikoresho byo mu gikoni, ikiraro cy’inkoko kirimo inkoko, abakozi b’ikigo, ibikoresho byo mu biro ( Computers, intebe, ameza n’ibindi…amafaranga ari kuri konti z’ikigo, abanyeshuri biga muri iyi ECD n’ibindi.

Muri iki gikorwa hari ibyifuzo byatanzwe n’ubuyobozi bw’iki kigo:

Kubongerera umuriro w’amashanyarazi kuko uhari ari muke ku buryo hari imashini zimwe na zimwe bafite udashobora kwatsa, gukora umuhanda ujyayo utameze neza, kubaka ishuri ribanza ku buryo abana baharangije bajya baryimukiramo batabanje gukora ingendo ndende, amazi ataboneka uko bikwiye..

Umuyobozi w’Akarere ka Nyabihu yashimiye umufatanyabikorwa RCR igikorwa cyiza bakoze ndetse abasaba ko bitahagararira aho bakomeza gufatanya n’Akarere mu gukurikirana iyi ECD ku bijyanye n’imbogamizi zagaragajwe, Umuyobozi yabijeje ko Ubuyobozi bw’Akarere bugiye gukora ibishoboka ngo bikemuke.