Ku wa gatatu , tariki ya 16 Nyakanga 2025, mu cyumba mberabyombi cy’Akarere  habereye inama yahuje Ubuyobozi bw’Akarere ka Nyabihu n’abayobora ibirombe bya kariyeri, igamije gusobanurira abikorera (abayobora ibirombe bya kariyeri) uburyo bushya bwo gutanga amahoro ku bukode bw’ibirombe ndetse no kubasobanurira amategeko ajyanye no kurengera ibidukikije. Inama yayobowe n’Umuyobozi w’Akarere wungirije ushinzwe iterambere ry’ubukungu, Bwana Habanabakize Jean Claude.

Inama yibanze ku gusobanukirwa amabwiriza agenga kariyeri, aho abitabiriye inama bongeye kwibutswa amategeko n’ibihano bijyanye n’imicungire ya Mine na Kariyeri, basabwe kandi kujya batangira abakozi babo ubwisungane, gutanga Ejo Heza, kugira uruhare mu iterambere ry’aho bakorera, kwishyura ku gihe imisoro ndetse no kwirinda amakimbirane hagati yabo.

Abitabiriye inama basobanuriwe uburyo bushya abashoramari bazajya bishyuramo amafaranga yo gukodesha umutungo wa Leta, aho umugenzuzi w’imisoro n’amahoro mu Karere yagaragaje amafaranga yari ateganyijwe kwishyura mu birombe, ayishyuwe ndetse n’atarishyurwa mu birombe. Kuri iyi ngingo, Umuyobozi w’Akarere wungirije ushinzwe iterambere ry’ubukungu yasabye abitabiriye inama ko umuntu utarishyura imisoro y’umwaka 2024-2025,  ko bitarenze ku itariki ya 23/7/2025 yaba barangije kwishyura.

Basobanuriwe nanone uburyo bushya, aho hazajya hishyurwa amahoro agendanye n’uburyo umutu yakoze cyane ko byari byaragaragaye ko hari igihe umuntu atanga amafaranga kandi bikarangira adakoze, bityo ubu buryo bushya buzakemura iki kibazo kandi n’Akarere kagire impinduka ku mafaranga kinjiza.