Kuri uyu wa kabiri, tariki ya 14 Ugushyingo 2023, mu Midugudu yose igize Akarere ka Nyabihu, binyuze mu Nteko z’abaturage, mu rwego rwo kuzamura uruhare abaturage bagira mu bibakorerwa, habaye ibikorwa cyo kugaragariza abaturage ibyavuye mu mishanga y’ibitekerezo n’ibyifuzo batanze mu gutegura ingengo y’imari y’umwaka wa 2023-2024, ndetse no gukusanya ibitekerezo bishya bizifashishwa mu gutegura igenamigambi ry’umwaka wa 2024-2025.

Umuyobozi w’Akarere ka Nyabihu wungirije ushinzwe iterambere ry’ubukungu, Bwana Habanabakize Jean Claude yatangirije iki gikorwa mu Murenge wa Rugera, aho yayoboye kandi yifatanya n’abaturage b’Akagari ka Nyagahondo, Umudugudu wa Muhare, muri iki gikowa.

Umuyobozi w’Akarere ka Nyabihu ushizwe imibereho y’abaturage, Bwana Simpenzwe Pascal, yitabiriwe Inteko y’abaturage mu Murenge wa Rurembo, Akagari ka Murambi, aho yatangije iki gikorwa cy’igenamigambi rishingiye ku byifuzo by’abaturage.

Muri iki gikorwa abaturage bo mu Midugudu itandukanye nk’uko twabivuze haruguru baganirijwe ku ruhare rwabo mu igenamigambi, Imihigo, ingengo y’imari by’umwaka wa 2024-2025; abaturage bahawe umwanya wo gutanga ibitekerezo n’ibyifuzo basaba ko byazitabwaho mu igenamigambi, n’ingengo y’imari. Muri rusange, hatanzwe ibitekerezo bikubiye mu ngingo eshatu, ari zo: Ubukungu, imibereho myiza n’imiyoborere myiza.

Abaturage bagaragarijwe ibimaze gukorwa hamwe n’ibigikomeje, basabwa kujya bagaragaza buri gihe uruhare rwabo kugira ngo ibikorwa byagezweho birambe.