Kuri uyu wa kane, tariki ya 20 Nyakanga 2023, mu cyumba cy’inama cy’Akarere ka Nyabihu, habereye inama itegura Umunsi mpuzamahanga wa koperative ku rwego rw’Akarere, yayobowe n’Umuyobozi w’Akarere ushinzwe iterambere ry’ubukungu, Bwana Habanabakize Jean Claude, mu butumwa yahaye abitabiriye iyi nama yabasabye kunoza imicungire y’umutungo wa koperative, ashishikariza koperative kongera ishoramari no kunoza ubucuruzi zikora hagamijwe kubyaza umusaruro ibikorwaremezo byubakwa mu Karere, nk’imihanda inyura mu nzuri za Giswati.

Umuyobozi yakomeje kandi yifuza ko uyu munsi mpuzamahanga wa koperative, ku rwego rw’Akarere koperative zazagaragaza ibikorwa zagezeho n’uburyo ateza imbere abanyamuryango hagamijwe no gushishikariza abataritabira koperative kuzitabira.

Muri iyi nama, hafashwe imyanzuro itandukanye irimo ko abitabiriye bamenyeshejwe ko Umunsi mpuzamahanga wa koperative, ku rwego rw’Igihugu uzizihizwa ku itariki ya 28 Nyakanga 2023, ukaba ufite insangayamatsiko igira iti’’Koperative zifasha kwihutisha iterambere rirambye’’, ku rwego rw’Akarere, Akarere  kemerewe guhitamo umunsi ukanogeye ntikarenze itariki ya 30 Kanama 2023; koperative zizagira uruhare mu gushaka ibikenewe kugira ngo uwo munsi ugende neza. Imirenge yasabwe gushishikariza kopeative zose kuzitabira uyu munsi.

Iyi nama kandi yitabiriwe n’umuyobozi w’ishami rishinzwe guteza imbere ishoramari n’umurimo, umukozi ushinzwe koperative ku rwego rw’Akarere, abakozi bashinzwe koperative ku Mirenge, ubuyobozi bw’amahuriro ya za koperative, abayobozi ba za koperative.