Mu cyumba cy’inama cy’Akarere ka Nyabihu, kuri uyu wa mbere, tariki ya 09 Kamena 2025, habereye inama y’igihembwe cya kane  cya Komite ishinzwe imicungire y’imishinga mu Karere(DPMC)  ku mushinga wa Volcanoes Community Resilience Project(VCRP), mu mwaka wa 2024-2025, iyobowe n’Umuyobozi w’Akarere wungirije ushinzwe iterambere ry’ubukungu, Bwana Habanabakize  Jean Claude. Iyi nama kandi yitabiriwe n’abakozi ku rwego rw’Akarere, abakozi baturutse mu Mirenge yose igize Akarere ka Nyabihu, abakozi b’umushinga VCRP.

Abitabiriye iyi nama barebeye hamwe ishusho y’aho umushinga ugeze ushyirwa mu bikorwa, yemeje ibyavuye mu igenamigambi ryavuye ku rwego rw’Umudugudu (VLUAPs) batch2, barebeye hamwe kandi ingengo y’imari Ikigo cy’Igihugu gishinzwe amazi( Rwanda Water Resources Board (RWB) n’Ikigo cy’Igihugu gishinzwe umutungo kamere(REMA) bageneye Akarere mu ngengo y’imari y’umwaka 2025-2026.

Muri rusange inama yasanze imirimo iri kugenda neza, Umuyobozi yashimiye abafatanyabikorwa babigiramo uruhare; mu gukora amaterasi ndinganire basanze ibikorwa bigeze kuri 56.25%(45/80), mu kubaka ibigega bifata amazi, hamaze kubakwa ibigega 30 kuri 60 biteganywa kubakwa. Mu kwemeza ibyavuye mu igenamigambi ryakozwe ku rwegorw’Umudugudu( VLUAPS) batch2, inama yemeje ibikorwa byose byavuye mu Midugudu 15 yo mu Mirenge ya Karago na Kintobo.

Ku bijyanye n’ingengo y’imari abafatanyabikorwa bohereje ku Karere, inama yasabye abakozi b’umushinga gufatanya n’ishami ry’igenamigambi mu Karere  kureba ko amafaranga yabyo yimukanwa mu mwaka w’ingengo y’imari utaha wa 2025-2026.