Mu Karere ka Nyabihu, kuri uyu wa gatatu, tariki ya 23 Mutarama 2019, habereye inama y’inteko rusange ya JADF INKINGI NYABIHU. Iyi nama yatangiye saa tatu za mu gitondo iyobowe n’umuyobozi wa JADF mu Karere ka Nyabihu, Bwana TWIZERIMANA Ildephonse, itangizwa ku mugaragaro n’umuyobozi w’Akarere ka Nyabihu, Madamu MUKANDAYISENGA Antoinette. Inama y’inteko rusange ya JADF INKINGI yari yatumiwemo; Abagize Inama Njyanama y’Akarere ka Nyabihu, Inzego z’ubuyobozi mu Karere ka Nyabihu, Abahagarariye inzego z’umutekano, Ibigo bya Leta n’ibyigenga bikorera mu Karere ka Nyabihu, Abikorera, Abahagarariye amadini n’amatorero, Imiryango nyarwanda n’imiryango mvamahanga ikorera mu Karere ka Nyabihu, Abahagarariye inganda nini, nto n’ abanyabukorikori, Komite ya JADF INKINGI icyuye igihe, Abayobozi b’amakoperative, JADF Coach mu Ntara y’Iburengerazuba… Inama y’inteko yize ku ngingo nyinshi zitandukanye, harimo; Kuvugurura urutonde rw’abafatanyabikorwa, Kurwanya imirire mibi n’igwingira ry’abana bato, Kurwanya ruswa, akarengane n’ihohoterwa, Kugena gahunda y’ibikorwa bya JADF 2018-2019, Ihererekanyabubasha hagati ya Komite icyuye igihe na Komite nshya ya JADF. Nyuma y’ikiganiro n’impanuro zitandukanye ku mikorere ya JADF, inzego zose zasanze zibumbiye muri JADF, nta we ugomba kuyitirira undi, akaba ari yo mpamvu bose bagomba kunoza imikorere, hatangwa amakuru no gukorera ku gihe. Komisiyo zigize JADF zasabwe kubahiriza ingengabihe zigakora kuko akenshi usanga ari ho ibibazo byinshi bikemukira. Hibukijwe kandi gufasha JADF kugira ngo ibone ubushobozi bwo gukora neza, hasabwe ko raporo ya JADF yajya iganirwaho mu nama z’Inama Njyanama y’Akarere kugira ngo harebwe uruhare rw’abafatanyabikorwa mu iterambere ryako. Inama yarangiye ubuyobozi bw’Akarere ka Nyabihu bushimira abafatanyabikorwa kubera uruhare rukomeye bagira mu iterambere ry’Akarere.