Inteko rusange ya JADF Inkingi/ Nyabihu yateraniye mu cyumba cy’inama cy’Akarere ka Nyabihu, abayitabiriye baganira ku ngingo zitandukanye, ari zo : kurebera hamwe ibyagezweho mu mwaka w’ingengo y’imari 2021-2022, gusuzumira hamwe ibibazo bibangamiye abaturage (HIS) no kubishakira ibisubizo, kuvugurura Komite mpuzabikorwa ya JADF Inkingi/ Nyabihu.

Muri rusange, abitabiriye inteko bishimiye ibyagezweho ku bufatanye, hafatwa ingamba zo kurushaho kunoza ubufatanye hagamijwe iterambere rirambye.

Muri iyi nteko rusange hatowe Komite mpuzabikorwa nshya ya JADF Inkingi Nyabihu izayobora mu myaka ibiri iri imbere,

1. Umuyobozi : Pastor Twizerimana Ildephonse
2. Umuyobozi wungirije: Bwana Habanabakije Jean Claude
3. Umunyamabanga: Bwana Karambizi Benjamin
4. Umubitsi: Madamu Uwamahoro Yvonne
5. Umuyobozi wa Komisiyeo y’ubukungu: Madamu Ingabire Drocelle
6. Umuyobozi wa Komisiyo y’imibereho myiza n’ubutabera: Bwana Habimana Etienne

Umuyobozi wungirije w’Inama Njyanama y’Akarere ka Nyabihu, Bwana Ngororano Damien asoza inteko rusange yashimiye uburyo  yateguwe n’icyerekezo gihawe JADF Inkingi Nyabihu, ndetse hashingiye ku ntumbero n’umurongo dukesha Nyakubahwa Perezida wa Repubulika cyane cyane mu gushakira umuti ibibazo bibangamiye imibereho myiza y’abaturage.

Uyu muyobozi kandi yakomoje ku bufatanye, agaragaza ko nta cyakorwa neza hatari ubumwe bw’abafatanyabikorwa, yasabye ubuyobozi bw’Akarere gushyira imbaraga mu kurwanya igwingira  n’imirire mibi, bigacika burundu; yashimiye cyane intambwe yatewe aho Akarere ka Nyabihu karwanyije imirire mibi n’igwigira by’abana bato, aho kavuye kuri 59%, ubu kakaba kageze kuri 33%, akomeza asaba ko ariko hatagomba kubaho kwirara.

Yasabye ko ubufatanye bugomba kugaragara mu nzego zose ndetse no mu madini, ko ibikorwa byo guhugura abaturage bikwiye kwitabwaho, kuzamura imyumbvire y’abaturage, bigomba kwibandwaho kandi ko iyo hari ubufatanye, byose bishoboka.