Kuri uyu wa 07 Ugushyingo 2025, Akarere ka Nyabihu katangije ku mugaragaro icyumweru cy’ubukangurambaga ku mirire iboneye no kurwanya igwingira ry’abana, gahunda igamije guteza imbere imirire myiza no kuzamura imibereho y’abana bakiri bato. Iki gikorwa cyabereye mu Murenge wa Kintobo, gihuriza hamwe Umuyobozi w’Akarere MUKANDAYISENGA Antoinnette, inzego z’ubuzima, abayobozi b’inzego z’ibanze ndetse n’abafatanyabikorwa batandukanye bakorera mu rwego rw’iterambere ry’ubuzima bw’abaturage.

Iki cyumweru cyatangirijwe mu Mudugudu wa Rutoyi wo mu Kagari ka Nyagisozi, aho abaturage bateraniye kugira ngo bigishwe ku kamaro k’imirire yuzuye, isuku, iterambere ry’abana bato ndetse n’ingamba zitandukanye zo kurwanya igwingira. Habayeho kandi ibikorwa byo kwerekana uko bateka indyo yuzuye hakoreshejwe ibiribwa biboneka mu karere, ndetse n’ipimwa ry’abana hagamijwe kumenya abakennye imirire.

Mu ijambo rye, Umuyobozi w’Akarere yashimangiye ko kurwanya igwingira ari inshingano rusange, kuva ku miryango n’abajyanama b’ubuzima kugeza ku bafatanyabikorwa b’iterambere, kugira ngo buri mwana akure neza kandi agere ku bushobozi bwe bwose. Yasabye ababyeyi gushyira imbaraga mu binyabubasha by’imirire myiza no gukoresha serivisi z’ubuzima zibegereye.

Itangizwa ry’iki cyumweru ritangiye urugendo rw’ibikorwa bitandukanye birimo ibiganiro mu baturage, ubukangurambaga, n’ibikorwa by’ubuzima bigamije kongera ubushobozi bw’ingo mu mirire no guteza imbere imibereho myiza y’abana bato mu karere hose.