Uyu munsi, tariki ya 07 Mata 2024, kimwe n’ahandi hose mu Gihugu, ndetse no ku isi yose, mu Midugudu igize Akarere ka Nyabihu, hatangijwe icyumweru cy’icyunamo na gahunda y’iminsi 100 yo kwibuka ku nshuro ya 30 Jenoside yakorewe abatutsi mu mwaka w’1994.

Ku rwego rw’Akarere ka Nyabihu, igikorwa cyo  kwibuka ku nshuro ya 30 Jenoside yakorewe abatutsi mu 1994 na gahunda y’iminsi 100 y’ibikorwa byo kwibuka cyatangirijwe ku rwibutso rw’Akarere ka Nyabihu ruherereye mu Murenge wa Mukamira.

Iki gikorwa cyitabiriwe n’Abadepite mu Nteko Ishinga amategeko, aribo, Honorable Bakundufite Christine na Honorable Ayinkamiye Speciose; hari kandi abayobozi batandukanye baturutse ku rwego rw’Akarere barimo; Abagize Inama Njyanama y’Akarere ka Nyabihu, abagize Inama y’umutekano itaguye y’Akarere ka Nyabihu, abaturage baturutse mu Murenge wa Mukamira n’abandi bo mu Mirenge yegereye Umurenge wa Mukamira, ariyo Jenda, Karago, Kintobo.

Igikorwa cyo gutangiza cyaranzwe no gucana urumuri rw’icyizere, isengesho, ijambo ry’ikaze, ikiganiro kijyanye no kwibuka Jenoside yakorewe abatutsi, ubuhamya kuri Jenoside yakorewe abatutsi, indirimbo zijyanye no kwibuka, ubutumwa bwatanzwe n’uhagarariye IBUKA mu Karere ka Nyabihu, gushyira indabo ku rwibutso rushyinguwemo imibiri y’inzirakarengane zazize Jenoside yakorewe abatutsi, nyuma yo kumva ubutumwa bw’umushyitsi mukuru , Hon. Bakundufite Christine, habayeho umwanya wo gukurikirana ijambo rya Perezida wa Repubulika y’u Rwanda, Nyakubahwa Kagame Paul.

Twibuke twiyubaka.