Abakozi b’ibitaro bya Shyira bibutse kuri uyu wa gatatu, tariki ya 10/4/2019, abahoze ari abakozi b’ibi bitaro, abarwayi n’abarwaza bazize Jenoside yakorewe Abatutsi mu mwaka w’1994. Iki gikorwa cyatangijwe n’urugendo rwo kwibuka rwavuye ku biro by’Umurenge wa Shyira rusorezwa ku Bitaro bya Shyira, hakurikiraho umuhango wo gushyira indabo kuri monument yubatswe muri ibi bitaro iriho amazina y’abazize Jenoside yakorewe Abatutsi. Hatanzwe kandi n’ubuhamya bugaragaza ubukana bw’iyi Jenoside yakorewe Abatutsi, hatanzwe ibiganiro bibiri byateguwe na CNLG, hatanzwe inka yavuye ku nkunga yakusanyijwe n’abakozi b’ibitaro bya Shyira ishyikirizwa umuryango warokotse Jenoside.

Uyu muhango witabiriwe n’Umuyobozi w’Akarere ka Nyabihu, Madamu Mukandayisenga Antoinette wakiriwe n’Umuyobozi w’ibitaro bya Shyira, Major Dr Kayitare Emmanuel ari kumwe n’Umunyamabanga Nshingwabikorwa w’Umurenge wa Shyira, Bwana Niyibizi Rwigimba Louis.

Hari nanone Umuyobozi w’Ingabo mu Karere ka Nyabihu, Ukuriye Inkeragutabara mu Karere ka Nyabihu,Ukuriye Polisi mu Karere ka Nyabihu,Umuyobozi wa NISS, Umuyobozi wa RIB, Umuyobozi wa DASSO mu Karere ka Nyabihu, Perezida wa IBUKA mu Karere ka Nyabihu, Uhagarariye Umushumba w’Itorero ry’ Angilikani Diyoseze ya Kivu, abakozi b’ibitaro bya Shyira, abahagarariye imiryango ifite ababo bazize Jenoside yakorewe Abatutsi, abaturage.