Ibirori byo kwizihiza Umunsi mukuru wo kwibohora byabereye mu Midugudu yose igize Akarere ka Nyabihu kuri uyu wa kabiri, tariki ya 04 Nyakanga 2023, ku rwego rw’Akarere wizihirijwe mu Murenge wa Rurembo, Akagari ka Rwaza, Umudugudu wa Bugeshi, ahatashywe amazu abiri yubakiwe imiryango yasenyewe n’ibiza hamwe n’inyubako z’ibyumba bitatu by’amashuri. Umushyitsi mukuru muri uyu muhango yari Umuyobozi w’Akarere ka Nyabihu, Madamu Mukandayisenga Antoinette wari kumwe ari kumwe n’uhagarariye Inama Njyanama y’Akarere ka Nyabihu n’abahagarariye inzego z’umutekano.

Abandi bagize Komite Nyobozi y’Akarere bizihirije uyu munsi mu Mirenge itandukanye ku buryo bukurikira;

Umuyobozi w’Akarere ushinzwe iterambere ry’ubukungu yifatanyije n’Umurenge wa Karago, ahatashywe amazu yubakiwe imiryango itandatu yasenyewe n’ibiza, inyubako z’ibyumba by’amashuri, umuyoboro w’amazi ufite uburebure bwa 3.4km wubatswe ku bufatanye bw’Akarere na Rwanda Mountain Tea.

Umuyobozi w’Akarere ushinzwe imibereho myiza yakoreye mu Murenge wa Kintobo, ahatashywe TVET Wing Kintobo hamwe n’inzu yubakiwe umurayngo wasenyewe n’ibiza.

Umunyamabanga Nshingwabikorwa w’Akarere yakoreye mu Murenge wa Kabatwa, hatahwa umuhanda wa Vuga-Kiramira-Gaharawe ufite uburebure bwa 2.8km,  hamwe n’inyubako ebyiri z’Utugari twa Rugarama na Batikoti.

Umuyobozi w’imirimo rusange yakoreye mu Murenge wa Mukamira hatahwa ikiraro cy’abanyamaguru(cyo mu kirere) gifite uburebure bwa 38m.

Muri rusange hatanzwe ubutumwa bushima ibyagezweho mu myaka 29 harimo kubohora Igihugu no guhararika jenoside yakorewe abatutsi, iterambere mu nkingi: Ubukungu, imibereho myiza, imiyoborere myiza.

Abitabiriye ibirori by’umunsi mukuru wo kwibohora basabwe gukomeza gusigasira ibyagezweho mu nkingi zose no gukomeza kubigiramo uruhare hagamijwe iterambere rirambye kandi ridasubira inyuma.