Umunsi mukuru w’Umuganura wizihijwe kuri uyu wa gatanu, tariki ya 04 Nyakanga 2023, mu Midugudu yose igize Akarere kea Nyabihu, ku rwego rw’Akarere wabereye mu Murenge wa Kintobo, witabirwa n’Umuyobozi w’Akarere kea Nyabihu, Madamu Mukandayisenga Antoinette akaba n’umushyitsi mukuru muri uyu muhango, hari kandi abahagarariye inzego z’umutekano, bamwe mu bagize Inama Njyanama y’Akarere kea Nyabihu.

Muri uyu munsi mukuru w’Umuganura, ufite insanganyamatsiko igira iti” Umuganura, isoko y’ubumwe n’ishingiro ryo kudaheranwa’’ hatanzwe inyigisho zitandukanye, zirimo; ikiganiro cy’Umunsi w’Umuganura, indirimbo, imivugo, ikinamico ijyanye no kurwanya amakimbirane yo mu ngo.

Mu rwego rwo kwifatanya n’abaturage kwizihiza uyu munsi mukuru w’Umuganura, abandi bagize Komite Nyobozi y’Akarere ka Nyabihu bakoreye mu Mirenge itandukanye, aho Umuyobozi w’Akarere wungirijhe ushinzwe iterambere ry’ubukungu, Bwana Habanabakize Jean Claude yifatanyije n’abaturage b’Umurenge wa Mulinga. Umuyobozi w’Akarere wungirije ushinzwe imibereho myiza yifatanya n’abaturage b’Umurenge wa Rurembo naho Umuyobozi w’imirimo rusange mu Karere yakoreye mu Murenge wa Kabatwa.

Mu Murenge wa Kintobo, Umuyobozi w’Akarere yibukije abaturage guharanira ubumwe bw’abanyarwanda kuko ari zo mbaraga zacu, yabasabye ubufatanye mu kwesa Imihigo y”Akarere, baharanira kugira agakayi k’umuryango. Abitabiriye uyu Munsi mukuru basabwe gukomeza gusigasira ibyagezweho no gushaka ibisubizo ku bitaragerwaho mu muryango, igikorwa cyashojwe n’ubusabane no gusangira ibyateguwe bikomoka ku musaruro wagezweho.