Kuri uyu wa 27 Nzeri 2025, mu Kagari ka Cyimanzovu, Umurenge wa Shyira, habereye Umuganda usoza ukwezi ku bufatanye n’inzego zitandukanye, witabirwa na Minisitiri w’Ubutegetsi bw’Igihugu,HABIMANA Dominique.

Muri uyu muganda hatewe ibiti by’avoka 2000 ku bufatanye na Equity Bank Rwanda,hanacukurwa imyobo izashyira imbuto z’ibiti bivangwa n’imyaka, byose hamwe hakazaterwa ibingana n’ibihumbi 7. Iki gikorwa kigamije guteza imbere imibereho myiza y’abaturage, kurwanya imirire mibi no kongera umusaruro w’ubuhinzi.

Nyuma y’umuganda, Minisitiri Habimana Dominique yagiranye ikiganiro n’abaturage cyibanze ku ngingo zitandukanye. Yabasabye gukomeza gusigasira umutekano, kuko ari wo shingiro ry’iterambere ry’igihugu.

Yanibukije akamaro ko gutura neza, abantu bakirinda kubaka mu manegeka kugira ngo barinde ubuzima bwabo n’ubw’abandi. Yanasabye buri wese kugira uruhare mu kubungabunga isuku mu ngo no mu midugudu.

Minisitiri kandi yashishikarije abaturage kubungabunga ibidukikije, by’umwihariko kwita ku biti byatewe muri uyu muganda. Yongeye kwibutsa akamaro ko kwitabira uburezi, buri mwana akajya ku ishuri kugira ngo igihugu kizagire ejo hazaza heza.

Umuganda wabaye n’umwanya wo kugaragaza ubufatanye hagati ya Leta, abaturage n’abafatanyabikorwa mu iterambere. Equity Bank Rwanda yashimangiye ko izakomeza gufatanya n’abaturage mu bikorwa bigamije iterambere rirambye.