Kuva ku itariki ya 10 Werurwe 2025 kugeza 12 Werurwe 2025, mu Karere ka Nyabihu habereye ubukangurambaga bwa BYIKORERE kuri serivisi zisabwa binyuze ku rubuga Irembo.

Nyuma yo guhabwa ikaze n’Umuyobozi w’Akarere ka Nyabihu Mukandayisenga Antoinette, uwaje ayoboye itsinda ry’abakozi boherejwe n’Irembo yagaragaje ko ikibagenza ari ugufatanya n’Akarere ka Nyabihu gukangurira abaturage uburyo bwa BYIKORERE, aho umuturage yisabira serivisi atanyuze ku wundi muntu (agent).

Nyuma y’ikaze, ubukangurambaga bwakomereje mu Mirenge itandatu (Mukamira, Kabatwa, Jenda, Karago, Kintobo na Mulinga, aho ku munsi umwe bwakorerwaga mu Mirenge 2. Ibi bikaba bije bisanga indi Mirenge 4 yari yarabukorewemo mu cyiciro cyabanje.

Muri ubu bukangurambaga, abaturage bigishijwe byinshi ku bijyanye no kwisabira serivisi binyuze ku rubuga Irembo, hakoreshejwe telephone cyangwa mudasobwa kubashobora kuzibona.

Hagarutswe cyane ku buryo bubiri bwifashishwa mu kwinjira ku rubuga Irembo, aribwo *909#  kuri telephone iyo ariyo yose, aho umuntu ashobora kwisabira zimwe muri serivisi zibonekaho zirimo Mituweli, serivisi za Polisi, Icyemezo cy’amavuko, icyemezo cy’uko uri ingaragu n’izindi zizagenda zongerwaho.

Ubundi buryo ni ukunyura ku rubuga rw’Irembo ukoresheje murandasi arirwo www.irembo.gov.rw aho ushobora gusanga serivisi zose zashyizwe ku rubuga Irembo, maze umuntu agahitamo iyo ashaka gusaba.

Ubu bukangurambaga bukaba bwarasojwe abaturage ndetse n’Ubuyobozi bishimira iki gikorwa cy’ingirakamaro kije gufasha abaturage b’Akarere ka Nyabihu kwisabira serivisi z’Irembo bityo umwanya ndetse n’amafaranga y’ingendo bakoreshaga bakabizigama.