Umuyobozi wungirije ushinzwe imibereho myiza y’Abaturage, Bwana Simpenzwe Pascal,hamwe n’abagize Inama Njyanama y’Akarere, kuri uyu wa 29 Nzeri 2029,bitabiriye ubukangurambaga bwabereye mu Kigo cy’urubyiruko mu Karere ka Nyabihu buzwi nka “SOBANUKIRWA RFI 2025”,bugamije gusobanurira abaturage serivisi zitangwa n’Ikigo cy’u Rwanda cy’ibimenyetso bya gihanga(RFI:Rwanda Forensic Institute) bikoreshwa mu butabera.

Muri serivisi zisobanurirwa abaturage harimo: gupima uturemangingo ndangamaraso (ADN), gupima uburozi, alukoro mu maraso, ibiyobyabwenge n’ibinyabutabire, gusuzuma ibimenyetso by’ikoranabuhanga, inkomere n’imibiri y’abitabye Imana, ibyahumanijwe na mikorobe ndetse no gupima ibimenyetso by’imbunda n’amasasu.

Ubu bukangurambaga bwasize abayobozi b’inzego z’ibanze bongerewe ubumenyi ku serivisi za RFI mu gutanga ubutabera bunoze, banaboneraho umwanya wo gusobanuza uburyo izi serivisi zimakaza imibanire myiza mu muryango nyarwanda.

Iki gikorwa cyanitabiriwe n’uhagarariye Umuyobozi Mukuru w’Ikigo cy’u Rwanda cy’ibimenyetso bya gihanga bikoreshwa mu butabera, Dr. Innocent Nkurunziza, wasobanuye uko serivisi z’iki kigo zikomeza gutanga umusanzu ukomeye mu kurwanya ibyaha no guteza imbere ubutabera bushingiye ku bimenyetso.

Mu ijambo rye, Bwana SIMPENZE yashimye ubuyobozi bwa Nyakubahwa Perezida wa Repubulika Paul Kagame, bwashyize imbere umuturage, anagaragaza ko gushyiraho iki kigo ari intambwe ikomeye mu gufasha abanyarwanda kubona ubutabera bwihuse kandi bushingiye ku bimenyetso bya gihanga.