Umuganda rusange usoza ukwezi kwa Nzeri 2024 wabaye kuri uyu wa gatandatu, tariki ya 28 Nzeri 2024, ukorerwa mu Tugari twose tugize Akarere ka Nyabihu. Ku rwego rw’Akarere, umuganda wabereye mu Murenge wa Rurembo, Akagari ka Rwaza, witabirwa n’Umuyobozi w’Akarere ka Nyabihu, Madamu Mukandayisenga Antoinette ari kumwe n’Umunyamabanga Nshingwabikorwa w’Umurenge wa Rurembo, abakozi batandukanye bakorera ku rwego rw’Akarere no ku Murenge.

Uyu muganda wibanze ku bikorwa byo kurwanya isuri hasiburwa inzira z’amazi mu muhanda uva ku Kagari ka Rwaza ujya ku Mudugudu wa Murama muri aka Kagari.

Nyuma y’umuganda abawitabiriye bahawe ubutumwa butandukanye bwatanzwe na Minisiteri zitandukanye ndetse n’ibigo bya Leta, harimo:

Gahunda ya Leta yo gufasha abaturage kwivana mu bukene n’uburyo abaturage bakwiye kubigiramo uruhare.

Gushishikariza abaturage gukomeza kugira umuco w’isuku ku mubiri, mu ngo zabo ndetse n’ahandi hahurira abantu benshi.

Ubutumwa bushishikariza abafite ubumuga kugira uruhare mu gutanga ibitekerezo ku ikusanyamakuru riri gukorwa bizashingirwaho mu igenamigambi rizafasha mu kwitaho ibyifuzo byabo.

Nyuma y’ibiganiro, Umuyobozi w’Akarere yakiriye ibibazo abaturage bamugaragarije harimo iby’umuntu ku giti cye n’ibijyanye n’iterambere muri rusange, abafasha kubibonera ibisubizo. By’umwihariko ibibazo bitahise bikemuka kubera imiterere yabyo, abakozi b’Akarere basabwe kubikurikirana abaturage bagasubizwa vuba.