Kuri uyu wa gatandatu, tariki ya 28 Mutarama 2023, mu Mirenge yose igize Akarere ka Nyabihu hakozwe umuganda ngarukakwezi usoza ukwezi kwa Mutarama, 2023. Ku rwego rw’Akarere wakorewe mu Murenge wa Rugera, Akagari ka Nyagahongo, Umudugudu wa Musenyi, uyu muganda witabiriwe na Guverineri w’Intara y’Uburengerazuba, Bwana Habitegeko Francois, ari kumwe n’umudepite mu Nteko ishinga amategeko, Hon. Bakundufite Christine, bakiriwe n’Umuyobozi w’Akarere ka Nyabihu, Madamu Muakandayisenga Antoinette ari kumwe n’abagize inama y’umutekano itaguye y’Akarere, Umuyobozi w’uruganda rw’icyayi rwa Nyabihu, ruhagarariye urugomero rw’amashanyarazi rwa Giciye ya gatatu (Giciye3).

Umuganda usoza Mutarama 2023, wibanze ku gukora umuhanda Tubungo-Giciye, hasiburwa ibiraro byarengewe n’isuri, mu rwego rwo kubungabunga ibikorwa remezo no kurwanya isuri.

Mu yindi Mirenge y’Akarere hakozwe umuganda wo kurwanya isuri, gukemura ibibazo bibangamiye imibereho myiza y’abaturage( Human security issues)…

Nyuma y’umuganda, abawitabiriye bahawe ibiganiro, hatangwa ubutumwa butandukanye, harimo: Kurwanya igwingira n’imirire mibi mu bana no mu babyeyi batwite, imyiteguro yo kwizihiza Umunsi mukuru w’Intwari uzaba ku wa gatatu, tariki ya 01 Gashyantare 2023, ubutumwa bwa Banki nkuru y’Igihugu bujyanye no kwitabira serivisi z’ikoranabuhanga, ubutumwa bujyanye na serivisi z’imisoro n’amahooro, ubutumwa bujyanye no kugira umuco w’isuku n’isukura, kurwanya isuri…

Abitabiriye umuganda bahawe umwanya wo gutanga ibitekerezo no kubaza ibibazo, hakiriwe ibibazo bitandatu(6), ibibazo bine(4) muri byo abayobozi bahise babibonera ibisubizo, ibindi bibazo bibiri(2) bisigaye bihabwa umurongo.