Kuri uyu wa gatatu, tariki ya 13 Mata 2022, mu Karere ka Nyabihu, habereye umuhango wo gushyingura mu cyubahiro imibiri y’inzirakarengane zazize jenoside yakorewe abatutsi mu mwaka wa 1994, mu rwibutso rwa Mukamira, rwubatse mu Murenge wa Mukamira, Akagari ka Rugeshi, Umududugu wa Kazuba.

Umuyobozi w’Akarere  ka Nyabihu, Madamu Mukandayisenga Antoinette, mu ijambo yavuze aha ikaze abitabiriye uyu muhango, yaboneyeho umwanya wo kwihanganisha imiryango yarokotse jenoside yakorewewe abatutsi, asubira muri make ku mateka yaranze aka karere, ahahoze ari Komini Nkuri, icyahoze ari Komini Karago.. ko ariho  hageragerejwe jenoside kuva kera na mbere ya 1994, akomeze asaba abitabiriye iki gikorwa gukomeza kuba umwe muri gahunda ya Ndi Umuyarwanda n’Ubumwe n’Ubwiyunge, yongera gusaba abafite amakuru y’aho imibiri yaba ikiri itarashyingurwa ko bagomba kuyatanga kugira ngo nayo ishyingurwe mu cyubahiro, iki kandi kikaba cyagarutsweho n’umuyobozi wa IBUKA mu Karere Nyabihu, Bwana Juru Anastase, wagaragaje ko hari imibiri myinshi y’inzirakarengane zazize jenoside yakorewe abatutsi itaraboneka ngo nayo ishyingurwe mu cyubahiro

Twibutse ko iyi mibiri ine yashyinguwe mu cyubahiro uyu munsi , irimo umwe wabonetse mu Murenge wa Mukamira, indi mibiri itatu yabonetse mu Murenge wa Jenda, ije isanga indi mibiri 2202 isanzwe iruhukiye mu rwibutso rwa Mukamira, yose hamwe ikaba ibaye imibiri 2206.

Guverineri w’Intara y’Uburengerazuba, Bwana Habitegeko Francois, yifatanyije n’abaturage b’Akarere ka Nyabihu muri uyu muhango, witabiriwe n’abayobozi batandukanye haba ku rwego rw’Igihugu, ndetse no kurw’Intara., harimo Abasenateri, Abadepite, abahagarariye inzego z’umutekano, abayobozi ndetse n’abakozi b’Akarere, abakozi ku Murenge n’Utugari, abashyitsi baturutse impande zose z’Igihugu hamwe n’abaturage benshi.

Minisitiri w’Ibidukikije, akaba n’imboni y’Akarere ka Nyabihu, Madamu Mujawamariya Jeanne d’Arc, ari nawe mushyitsi mukuru muri uyu muhango, yibukije abawitabiriye, ko bagomba gutahiriza umugozi umwe maze bakirinda icyabatandukanya, bubahiriza gahunda za Leta zigamije guhuza  abanyarwanda bose, bakirinda ingengabitekerezo ya Jenoside aho iva ikagera.

Twibuke twiyubaka.