Umunsi  mpuzamahanga w’abafite ubumuga wizihijwe kuri iki cyumweru, itariki ya 03 Ukuboza 2023, wizihirizwa mu Mirenge yose igize Akarere ka Nyabihu, ku rwego rw’Akarere uyu munsi mpuzamahanga w’abafite ubumuga wabereye mu Murenge wa Kabatwa, Akagari ka Gihorwe, Umudugudu wa Kaminuza.

Umunsi mpuzamahanga w’abafite ubumuga ufite insangamatsiko igira iti’’ Dufatanye n’abantu bafite ubumuga tugere ku ntego z’iterambere rirambye’’, umuhango wo kuwizihiza witabiriwe n’ Umuyobozi w’Akarere ka Nyabihu wungirije  ushinzwe iterambere ry’ubukungu, Bwana Habanabakize Jean Claude, akaba n’umushyitsi mukuru, yari kumwe n’Umuyobozi w’ishami ry’imibereho myiza mu Karere, Bwana Mutwarangabo Simon, uhagarariye urugaga rw’abagore mu Karere ka Nyabihu, uhagarariye urugaga rw’abafite ubumuga mu Karere, umukozi wa Gikuriro kuri bose, umufatanyabikorwa MCBO… akaba yahawe ikaze n’Umunyamabanga Nshingwabikorwa w’Umurenge wa Kabatwa, Madamu Kampire Georgette.

Muri uyu muhango hatanzwe ubutumwa butandukanye bujyanye n’uyu munsi mukuru, habaye n’igikorwa cyo kuremera abafite ubumuga bahabwa imifariso yo kuryamira( Matelas), intama zitanga icyororo cyiza hatangwa n’inyunganirangingo. Muri make, uyu munsi witabiriwe n’ibyiciro bitandukanye, harimo abakozi ku rwego rw’Akarere, ku rw’Umurenge n’Akagari, abahagarariye inzego z’umutekano( Army, DASSO, Police).