Umunsi mukuru w’Intwari z’Igihugu wizihijwe mu Midugudu yoise igize Akarere ka Nyabihu, ku rwego rw’Akarere wizihirijwe mu Murenge wa Rambura, Akagari ka Nyundo, Umudugudu wa Nama, kuri uyu wa gatatu, tariki ya 01 Gashyantare 2023.

Uyu munsi mukuru witabiriwe n’Umuyobozi  w’Akarere ka Nyabihu, Madamu Mukandsayisenga Antoinette, akaba n’umushyitsi mukuru muri iki gikorwa, witabiriwe kandi n’abandi bagize inama y’umutekano y’Akarere itaguye, abakozi ku rwego rw’Akarere, ku Murenge no ku Kagari, abanyamadini n’amatorero, abandi bakozi bakorera Leta hamwe n’abikorera mu Murenge wa Rambura.

Umuyobozi w’Akarere wungirije ushinzwe iterambere ry’ubukungu, Bwana Habanabakize Jean Claude yifatanyije n’abakozi hamwe n’abaturage b’Umurenge wa Bigogwe kwizihiza Umunsi mukuru w’Intwari z’Igihugu naho Umuyobozi w’Akarere wungirije ushinzwe imibereho myiza, Bwana Simpenzwe Pascal yakurikiranye ibikorwa by’uyu munsi mukuru mu Murenge wa Shyira.

Twibutse ko nk’uko byari biteganyijwe kuri gahunda y’uyu munsi mukuru, hatanzwe ikiganiro kijyanye n’Umunsi mukuru w’Intwari z’Igihugu, gifite insanganyamatsiko igira iti’’ Ubutwari bw’abanyarwanda, Agaciro kacu”. Nyuma y’ibiganiro, habaye imikino y’amarushanwa Umurenge Kagame cup muri ¼ cy’irangiza, aho Umurenge wa Bigogwe wahuye n’Umurenge wa Shyira.

Mu Murenge wa Rambura, kimwe no mu yindi Mirenge, ibirori byaranzwe n’imbyino, indirimbo, imyidagaduro, bishimira ibyagezweho ari nako hatangwa ubuhamya.