Umunsi mukuru wo kwibohora ku nshuro ya 28,  wizihijwe mu Midugudu yose igize Akarere ka Nyabihu, ku rwego rw’Akarere ka Nyabihu wizihirijwe mu Murenge wa Rambura, witabirwa n’Umuyobozi w’Akarere, Madamu Mukandayisenga Antoinette ari kumwe n’abahagarariye inzego z’umutekano hamwe n’abakozi kuva ku rwego rw’Akarere kugeza ku Kagari, abayobozi ku Mudugudu ndetse n’abaturage.

Abandi bayoboz n’abakozi  batandukanye ku rwego rw’Akarere bifatanyije n’abayobozi n’abaturage mu yindi Mirenge kwizihiza umunsi mukuru, aho Umuyobozi w’Akarere wungirije ushinzwe iterambere ry’ubukungu, Bwana Habanabakize Jean Claude yifatanyije n’abayobozi hamwe n’abaturage b’Umurenge wa Rurembo, Umuyobozi w’Akarere wungirije ushinzwe imibereho myiza, Bwana Simpenzwe Pascal yawizihirije mu Murenge wa Jomba, Umunyamabanga Nshingwabikorwa w’Akarere , Bwana Nsabimana Cyprien yawizihirije mu Murenge wa Kintobo, Umuyobozi w’imirimo rusange, Bwana Twagirayezu Jean Paul yifatanyije n’Umurenge wa Kabatwa.

Umunsi mukuru waranzwe no kumurika no gutaha ibikorwa bitandukanye byagezweho ku bufatanye bw’abayobozi, abaturage hamwe n’abafatanyabikorwa; hatangwa ubutumwa bwinshi hamwe n’impanuro zitandukanye, abaturage batanga ubuhamya bugaragaza ibikorwa byo kwibohora byagezweho, imbyino n’indirimbo byasusurukije abitabiriye umunsi.

Ibirori by’uyu munsi byashojwe n’umukino w’umupira w’amaguru wahuje ikipe ya Nyabihu Young Boys n’ikipe ya Police (DPU Nyabihu), urangira Nyabihu Young Boys itsinze Police ibitego 2 kuri 1.