Umunsi mukuru w’umuhinzi w’ibireti, ku rwego rw’Intara y’Iburengerazuba wizihirijwe  kuri uyu wa kane, tariki ya 18 Ukwakira 2024, mu Karere ka Nyabihu, Umurenge wa Kabatwa, Akagari ka Myuga. Abahinzi b’ibireti bahahuriye baturutse mu Karere ka Nyabihu, mu Mirenge ya Bigogwe, Jenda, Kabatwa, Mukamira; mu Karere ka Rubavu , Imirenge ya Bugeshi, Busasamana, Mudende.

Uyu munsi witabiriwe n’abashyitsi baturutse mu nzego zitandukanye barimo; Umuyobozi w’Ingabo mu Ntara y’Iburengerazuba, Perezida w’Inama Njyanama y’Akarere ka Nyabihu, Umuyobozi w’Akarere ka Rubavu, Umuyobozi w’Akarere wungirije ushinzwe iterambere ry’ubukungu mu Karere ka Nyabihu, Umuyobozi mukuru wa Horizon Sopyrwa, Uhagarariye NAEB, abahagarariye inzego z’umutekano mu Karere ka Nyabihu( Ingabo, Police, RIB, NISS), Abanyamabanga Nshingwabikorwa b’Imirenge ya Bigogwe, Bugeshi, Kabatwa, Mudende, Mukamira, Perezida w’ihuriro ry’amakoperative y’ibireti mu Rwanda, Perezida batanu b’amakoperative y’ibireti, abakozi bafite mu nshingano ibijyanye n’ubuhinzi mu Turere twa Nyabihu na Rubavu.

Ubuyobozi bwa Horizon SOPYRWA bwashimiye abahinzi b’ibireti uburyo bateza imbere ubuhinzi bwabyo cyane cyane ko umusaruro w’ibireti woherejwe hanze winjirije miliyoni icumi z’amadorari uyu mwaka  ushize kandi umusaruro w’ibireti byumye uruganda rwakiriye uturutse mu bahinzi ungana na toni 1632, uyu mwaka twatangiye hateganyijwe toni 1722.

Ubuyobozi bwa Horizon Sopyrwa bwatanze ibihembo ku bahinzi bitwaye neza, bigizwe n’inka 20 ( mu Karere ka Nyabihu hatanzwe inka 13), Matora zo kuryamaho, imitaka, amahema yo kwanikaho ibireti, amasuka.

Ubuyobozi bw’Akarere bwashimiye Horizon Sopyrwa uburyo ifasha abahinzi mu bikorwa bitandukanye bijyanye n’ubuhinzi bw’ibireti kandi bushishikariza abahinzi b’ibireti gusimburanya n’igihingwa cy’ibirayi kuko byongera umusaruro w’ibirayi.