Umunsi wahariwe ingo mbonezamikurire y’abana bato( ECD day), ku rwego rw’Intara y’Iburengerazuba wizihirijwe  mu Karere ka Nyabihu, Umurenge wa Bigogwe, witabirwa na Guverineri w’Intara y’Uburengerabuba, Bwana Habitegeko Francois, akaba yari umushyitsi mukuru muri iki gikorwa, yakiriwe n’Umuyobozi w’Akarere ka Nyabihu, madamu Mukandayisenga Antoinette ari kumwe n’abandi bagize inama y’umutekano itaguye y’Akarere ka Nyabihu.

Uyu munsi witabiriwe kandi n’Umuyobozi mukuru w’Ikigo cy’Igihugu gishinzwe imbonezamikurire y’abana bato(NCDA), Madamu Umutoni Gatsinzi Nadine, bamwe mu bagize inama y’ubutegetsi ya NCDA, Abayobozi  bungirije bashinzwe imibereho myiza mu Turere tugize Intara y’Iburengerazuba uko ari turindwi, intumwa y’Ikigo cy’Igihugu gishinzwe imiyoborere myiza( RGB), abafatanyabikorwa mu ngeri zitandukanye; RCR, Gikuriro kuri bose…

Igikorwa cyatangijwe no gahunda yo gusura ingo mbonezamikurire mu Mirenge ya Bigogwe, Jenda na Mukamira harebwa serivisi zihabwa abana bato bari hagati y’imyaka itatu n’itandatu(3-6). Habayeho kandi imurikabikorwa ry’ibikorwa n’abafatanyabikorwa banyuranye bakorera mu Karere muri gahunda yo kurwanya igwingira n’imirire mibi mu bana bato.

Hatanzwe ibiganiro byibanda cyane ku, gukomeza kubungabunga imikurire myiza y’abana hitabwa ku kubagaburira indyo yuzuye, gushishikariza ababyeyi kujyana bana mu bigo mbonezamikurire  (ECD), ubufatanye hagati y’ubuyobozi n’ababyeyi mu kubungabunga imibereho myiza y’abana.

Hatanzwe kandi ibihembo ku ngo mboneamikurire icumi (10) zikorera mu Mirenge itadukanye y’Akarere ka Nyabihu.