Uyu munsi, kuwa kabiri, tariki ya 15 Nyakanga 2025, Perezida w’Inama Njyanama y’Akarere ka Nyabihu, Bwana Habanabakize Protais ari kumwe n’Umuyobozi w’Akarere wungirije ushinzwe iterambere ry’ubukungu, Bwana Habanabakize Jean Claude, yakiriye itsinda ry’Abadepite mu Nteko ishinga amategeko bakorera muri Komisiyo y’ubumwe, uburenganzira bwa muntu no kurwanya Jenoside, rigizwe na Honorable Mukamana Alphonsine na Honorable Mushimiyimana Lydie, bari baherekejwe n’umukozi mu Nteko ishinga amategeko.

Aba badepite bagiriye uruzinduko mu Karere ka Nyabihu, mu rwego rwo kuganira n’Abayobozi b’Akarere mu nzego zitandukanye, abafatanyabikorwa mu bikorwa by’ubumwe n’ubudaheranwa, hagamijwe kurebera hamwe uko ubumwe n’ubudaheranwa bw’abanyarwanda buhagaze n’aho Akarere kageze gafasha  abarokotse Jenoside yakorewe abatutsi mu rwego rwo kurushaho guteza imbere ubumwe n’ubudaheranwa bw’abanyarwanda.

Nyuma yo kugaragarizwa n’ubuyobozi bw’Akarere ishusho y’uko Akarere gahagaze mu ngingo zitandukanye zari zikubiye mu isobanurampamvu  yatanzwe, abitabiriye batanze ibitekerezo, inyunganizi, barebera hamwe ku mbongamizi zihari no gushakira hamwe igisubizo mu kurushaho guteza imbere ubumwe n’ubudaheranwa bw’abanyarwanda.

Nyuma y’ibiganiro, uruzinduko rwabo rwakomereje mu Murenge wa Mukamira, mu bikorwa bikurikira; 

Gusura itsinda ry’ubumwe n’ubudaheranwa rihuriwemo n’abakoze Jenoside ndetse n’abayirokotse, urubyiruko rukomoka muri ibi byiciro byombi, harebwa ibimaze kugerwaho.

Gusura uwarokotse Jenoside utishoboye wasaniwe inzu mu gihe cyo kwibuka Jenoside yakorewe abatustsi.

Hasuwe kandi umuryango urimo uwakoze Jenoside agahanwa akaba yararangije igihano yari yarahawe.

Abadepite bashimye muri rusange Akarere ka Nyabihu, bashima intambwe imaze guterwa basaba ko ibikorwa biteza imbere ubumwe n’ubudaheranwa bw’abanyarwanda bikomeza gutezwa imbere.