Kuri uyu wa kabiri, tariki ya 01 Ukwakira 2024, itsinda ry’abakozi riturutse muri Banki y’isi( World Bank: WB), mu Kigo cy’Igihugu gishinzwe iterambere ry’ubwikorezi (Rwanda Transport Development Agency) :RTDA), ba rwiyemezamirimo (Contractors na Consultants), bagiriye uruzinduko mu Karere ka Nyabihu, baje mu gikorwa cyo gusura imihanda y’ubuhahirane ( Feeder roads) iri kubakwa mu gice cya Gishwati. Iyi mihanda ifite uburebure bureshya n’ibirometero mirongocyenda na bitatu (93kms).

Iki gikorwa cyatangiriye ku biro by’Akarere ka Nyabihu, aho Umunyamabanga Nshingwabikorwa w’Akarere , Bwana Mugiraneza David, yahaye ikaze abitabirye iki gikorwa, akaboneraho umwanya wo kubashimira ubufatanye bwabo n’Akarere ka Nyabihu.

Nyuma y’inama yabereye ku Karere, basuye imihanda ikurikira iherereye mu bice bya Gishwati, ariyo: Umuhanda wa Nteranya- Kareba, Arusha-Mizingo- Masha, Kagogo-Gakamba, Kibisabo- Mulinga na Rugamba-Gihirwa;  hagamijwe kugenzura uko uyu mushinga ushyirwa mu bikorwa no kumenya niba nta buvugizi bwihariye bukenewe kugira ngo binoge neza kurushaho.

Muri iki gikorwa cyo gusura, hagaragaye ko hakenewe gukomeza gukora ubuvugizi hakaboneka ingengo y’imari, bityo ahakenewe inzira z’amazi( Rigoles) hose zigashyirwaho, ndetse n’imikingo igashyirwaho inkuta ziyifata( Retaining walls) byose bigamije kubungabunga imihanda no kuyirinda kwangirika.

Igikorwa cyasorejwe mu Murenge wa Mukamira, gisozwa n’Umuyobozi w’Akarere wungirije ushinzwe imibereho y’abaturage, Bwana Simpenzwe Pascal, washimiye cyane Banki y’isi ubufatanye bwayo n’Akarere mu ishyirwamubikorwa ry’imishinga itandukanye, yakomeje abizeza ko Akarere kazakomeza gusigasira ibyagezweho, anasaba ko ubufatanye bwakomeza no mu yindi mishinga.