Itsinda ry’abakozi baturutse muri Banki y’isi (World Bank), mu Kigo cy’Igihugu gishinzwe ubuzima (RBC), mu Kigo cy’Igihugu gishinzwe imikurire no kurengera umwana ( NCDA), bagiriye uruzinduko mu Karere ka Nyabihu, kuri uyu wa kane, tariki ya 20 Mutarama 2022, hagamijwe gusura ibikorwa bigamije kurwanya  imirire mibi binyuze mu mushinga wo gukumira no kugabanya igwingira ( Stunting Prevention and Reduction Project SPRP).

Muri uru ruzinduko hasuwe ibikorwa bitandukanye, birimo Urugo mbonezamikurire rwa Kijote, ruherereye mu Murenge wa Bigogwe, Akagari ka Kijote, basuye kandi Igikoni cy’Umudugudu, aho basobanuriwe imikorere y’igikoni cy’Umudugudu, ibikorwa by’abajyanama b’ubuzima harimo gupima abana hifashishijwe umunzani, MUAC, ndetse n’umusambi (Length mat) maze basobanurirwa uruhare rw’ibyo bikorwa mu kurwanya imirire mibi n’igwingira mu bana bato.

Aba bakozi, nyuma yo gusura ibikorwa mu Murenge wa Bigogwe bakomereje uruzinduko rwabo mu Murenge wa Kabatwa, aho barebye ikoreshwa ry’ifishi y’imikurire y’umwana ikomatanya ibikorwa 22, basobanurirwa uburyo ikora kuva mu muryango, mu Mudugudu, mu Kagari no mu Murenge; ndetse n’umusaruro uboneka mu gukurikirana imikurire y’umwana hagamijwe kumurinda imirire mibi.

Nyuma yo gusura ibikorwa biterwa inkunga n’umushinga SPRP, abashyitsi bakoranye inama n’ubuyobozi bw’Akarere aho bwagaragarijwe ibyakozwe ndetse n’impinduka byagize mu Karere ka Nyabihu, bagaragarijwe kandi ingamba Akarere gafite mu rwego rwo gukomeza kurwanya imirire mibi n’igwingira bikigaragara mu Karere. Bakiriwe n’Umuyobozi w’Akarere ka Nyabihu, Madame Mukandayisenga Antoinette.