Mu rwego rwo kureba ikibazo cy’imiterere y’imbuto y’ibigori, kuri uyu wa gatatu, tariki ya 02 Gashyantare 2022, Umuyobozi mukuru w’Ikigo cy’Igihugu gishinzwe ubuhinzi n’ubworozi, Dr Karangwa Patrick, hamwe n’itsinda ayoboye bagiriye uruzinduko mu Karere ka Nyabihu, aho basuye imirima y’ibigori yatewemo RHMH1520, abanyamuryango ba Koperative y’ubuhinzi yitwa KOTEMII, mu Murenge wa Rugera.

Abagize itsinda bakomereje urugendo mu Murenge wa Shyira, aho basuye ahahinzwe imbuto ya WH507, WH605 na RHMH1520. Kuri iyi mbuto ya RHMH1520, Umuyobozi mukuru wa RAB, yasabye abashakashatsi bari bamuherekeje, ari bo; Dr. Ngaboyisonga Claver na Gafishi Martin kuyisubiramo maze ikajya ipfuka intete kugera hejuru no kuba yagira intete nini.

Itsinda rimaze gusura no kubona neza imitere y’Akarere, ryagaragaje ko Akarere kose katafatwa nk’imisozi miremire, harimo n’ahakeneye izindi mbuto. Mu kiganiro yagiranye na bo, abahinzi basaruraga RHMH1520, bagaragaje ko iyi mbuto batayikunze bagereranyije n’izindi mbuto nka WH507, WH605, WH101  Izi mbuto ariko ntabwo tuzemerewe kuko ni izo mu misozi iringaniye).

Umuyobozi mukuru wa RAB n’itsinda ayoboye bakomeje uruzinduko basura umucuruzi w’inyongeramusaruro, witwa Ndahayo Jean Claude, ukorera mu Murenge wa Mukamira. Uyu muyobozi yagejejweho icyifuzo cy’umwihariko w’Akarere wo kujya haboneka ifumbire igihe cyose, abahinzi bakaba bakwibaruza kenshi muri MOPA igihe bayikeneye. Baboneyeho umwanya wo gusura nanone ububiko bunini(stock), iherereye muri Mukamira, irimo imbuto y’ibigori n’ifumbire, abacuruzi bake bagaragaje imbogamizi y’ifumbire ya NPK iri kuboneka ari nke cyane ku buryo kuyibona bigorana.