Uyu munsi, Visi Meya w’Akarere ka Nyabihu ushinzwe imibereho myiza y’Abaturage, Bwana SIMPENZWE Pascal, yakiriye Helena Guarin, umukozi w’Umuryango w’Ubumwe bw’u Burayi mu Rwanda (European Union in Rwanda), ari kumwe n’abafatanyabikorwa batandukanye.

Itsinda ryasuye ibikorwa by’ubuhinzi biri mu Murenge wa Jomba, by’umushinga KUNGAHARA–FOSTERING, ufashwa n’Ubumwe bw’u Burayi (European Union in Rwanda) kandi ushyirwa mu bikorwa na FXB Rwanda ku bufatanye na E4Impact Rwanda.

Mu bikorwa bifashwa n’uyu mushinga harimo ubuhinzi bw’imigozi ikungahaye kuri Vitamine A n’imbuto z’amatunda, bigamije kurwanya imirire mibi n’igwingira mu baturage. Uyu mushinga kandi utanga amahugurwa ajyanye no kunoza isuku n’isukura, bityo ubuzima bwiza bukarushaho gutera imbere.

Muri iyi gahunda kandi hari Emmanuel KAYITANA, Umuyobozi wa FXB Rwanda, Eric MUSHIMIYIMANA ushinzwe umushinga KUNGAHARA–FOSTERING, ndetse na UWERA Gaudence, Agriculture Supply Chain Financing Specialist, wari uhagarariye Minisiteri y’Ubuhinzi n’Ubworozi (MINAGRI) muri FOSTERING Steering Committee no mu rugendo rwo gusura ibikorwa.

Hari kandi abahinzi n’Abayobozi b’Akarere ka Gakenke baje kureba uko ubuhinzi bukorwa muri Nyabihu, cyane ko uyu mushinga ukorera mu Turere tubiri gusa-Nyabihu na Gakenke.

Mu ruzinduko habayeho kumurikirwa ibyagezweho n’ibiteganywa gukorwa mu gihe kizaza.
Visi Meya SIMPENZWE Pascal yashimiye abaterankunga ku bufatanye bwabo n’umusaruro w’inkunga batanga mu bikorwa by’ubuhinzi, ashimangira ko ibikorwa nk’ibi bifasha abaturage kwiteza imbere no guteza imbere imibereho myiza.

“Turashimira abaterankunga n’abafatanyabikorwa bacu ku bw’umusanzu wabo mu iterambere ry’ubuhinzi. Ibi bikorwa bifasha abaturage bacu kugira imibereho myiza kandi birwanya imirire mibi,” Visi Meya SIMPENZWE Pascal.