Kuri iki cyumweru, tariki ya 20 Mata 2025, ku rwibutso rw’Akarere ka Nyabihu ruherereye mu Murenge wa Mukamira, habereye igikorwa cyo Kwibuka ku nshuro ya 31 Jenoside Yakorewe Abatutsi.

Umushyitsi mukuru muri iki gikorwa yari Guverineri w’Intara y’iburengerzazuba, Bwana Ntibitura Jean Bosco. Hari kandi n’abandi bashyitsi batandukanye barimo; Hon. Senateri Mureshyankwano Marie Rose, Hon. Depite Bakundufite Christine, Hon. Depite. Ayinkamiye Speciose, Hon. Bajeni Mpumuro, Hon. Uwacu Julienne( Umunyamabanga Nshingwabikorwa wa Unity Club Intwararumuri), Bishop Emmanuel Kolini, Bishop John Rucyahana, intumwa ya IBUKA ku rwego rw’Igihugu; Bwana Niyitanga Irene, Umuyobozi w’Inkeragutabara mu Ntara y’Iburengerazuba, Brig. Gen. Nelson Rwigema…

Abashyitsi bahawe ikaze n’Umuyobozi w’Akarere ka Nyabihu, Madamu Mukandayisenga Antoinette, ari kumwe n’abagize Inama Njyanama y’Akarere ka Nyabihu, abagize Komite Nyobozi y’Akarere, abahagarariye inzego z’umutekano zikorera mu Karere n’abandi bayobozi mu nzego zitandukanye.

Uyu munsi waranzwe n’ibikorwa bitandukanye, birimo;

Ikiganiro kuri Jenoside Yakorewe Abatutsi mu mwaka wa 1994,

Ubuhamya bw’uwarokotse Jenoside Yakorewe Abatutsi,

Hatanzwe ubutumwa bwo Kwibuka ku nshuro ya 31 Jenoside Yakorewe Abatusti mu mbwirwaruhame no mu ndirimbo,

Gushyingura mu cyubahiro imibiri y’abantu barindwi bishwe muri Jenoside Yakorewe Abatutsi  yabonetse mu Mirenge itandukanye no gushyira indabo ku rwibutso mu rwego rwo kunamira inzirakarengane zihashyinguye.

Twibuke twiyubaka !